Аўтобус з дзіцячай футбольнай камандай з Беларусі трапіў пад абстрэл дронаў. Пра гэта паведаміў часовы выканаўца абавязкаў губернатара Бранскай вобласці Ягор Кавальчук.
Са словаў расійскага чыноўніка, беспілотнік трапіў у аўтобус з дзіцячай футбольнай камандай ДЮСШ № 2 з Рэчыцы, якая ехала на адпачынак у Геленджык. Адказнасць за тое, што адбылося, Кавальчук усклаў на УСУ.
У выніку загінула жанчына, якая суправаджала каманду. Раненні атрымалі шэсць чалавек, у тым ліку чацвёра дзяцей.
«Усе пацярпелыя аператыўна дастаўленыя ў бальніцу, дзе ім аказаная неабходная медыцынская дапамога. Астатнія пасажыры найбліжэйшым часам будуць вернутыя дадому», — напісаў Ягор Кавальчук.
Украінскія крыніцы заявы в. а. губернатара Бранскай вобласці пакуль не каментавалі.
МЗС Беларусі праінфармавалі пра інцыдэнт у Бранскай вобласці, інфармацыя пра здарэнне ўдакладняецца, паведаміў дзяржаўны тэлеканал «Першы інфармацыйны».
Следчы камітэт Расіі распачаў крымінальную справу пра тэракт, перадае тэлеканал «Звезда». Паводле інфармацыі ведамства, у аўтобусе было 44 пасажыры, сярод якіх 28 дзяцей-спартоўцаў. Яны ехалі на адпачынак па маршруце Гомель — Геленджык.
Сем пацярпелых шпіталізаваныя. Стан аднаго дзіцяці цяжкі, паведамілі «Звезде» ў Мінздароўя РФ. Тэлемедыцынскія кансультацыі правядуць па ўсіх пацярпелых.